Awdalpress.com

Daawo:- Khudbadihii C/raxmaan Aw Cali iyo C/raxmaan Saylici ka jeediyeen Madashii duqayda dhaqanka ee RAYS lagu qabtay

staff-reporter — Tue, 18 Jun 2013 19:37:50 +0000

Daawo:- Khudbadihii C/raxmaan Aw Cali iyo C/raxmaan Saylici ka jeediyeen Madashii duqayda dhaqanka ee RAYS lagu qabtay

Muqdisho oo askari toogasho lagu dilay iyo Shan qof oo lagu dilay Kismaayo

staff-reporter — Tue, 18 Jun 2013 19:14:56 +0000

Awdalpress(Muqdisho) 18 Jun, 13—Koox hubeysan ayaa maanta gudaha xaafadda Taleex ee degmada Hodan ee gobolka Banaadir ee magaalada Muqdisho ku toogatay Askari la sheegay in uu ka tirsanaa ciidanka nabad sugidda qaranka Soomaaliyeed.

Goobjoogeyaal ayaa Bar-kulan u sheegay in dilkaasi ay geysteen labo dhallinyaro ah oo bastoolado ku hubeysnayd, kuwaasoo la sheegay in ay goobta ka baxsadeen.

Ciidamo ka tirsan askarta dowladda oo markiiba goobta gaaray ayaa halkaasi ka sameeyay walow aysan jirin cid ay dilkaasi u soo qabteen.

Baryihii dhowaa amniga Muqdisho waxa uu ahaa mid soo hagaagayay, iyadoo aynay jirin dilalkii qorsheysnaa oo sanadihii dhowaa magaalada aad ugu badnaa..

Shan qof oo ay ciidamo ku jiraan ayaa maanta lagu dilay magaalada Kismaayo ee xarunta gobolka Jubbada Hoose, iyadoo xaaladda magaalad ay tahay mid kacsan

Xiisadda ayaa dhalatay kaddib markii saaka la dhaawacay Yaasiin Nuur Gaas (Yaasiin Raadeer) oo ka mid ah saraakiisha magaalada Kismaayo, xilli uu socday howlgal lagu qaadayay jid-gooyo ay maleeshiyo dhigatay waddada aadda dekeda magaalada Kismaayo.

Goobaha ganacsi ee qeybo ka tirsan magaalada ayaa xiran iyadoo laga cabsi qabo in iska hor-imaadyo ay dhacaan.

Yaasiin Raadeer ayaa la sheegay inay rasaas madaxa ka haleeshay, isla markaana la geeyay isbitaalka ciidamada Howlgalka AMISOM ee magaalada Kismaayo.

RBK

Waxaan ku faraxsanahay kulanka aan kula kulmay adiga oo ah Ugaaskii Gadabuursi, Waxaan Cambaaryanayaa Dilkii Xarirad…. C/raxmaan Saylici

staff-reporter — Tue, 18 Jun 2013 19:09:48 +0000

Awdalpress(Borama) 18 Jun, 13–M/xigeenka Somalilan C/raxmaan C/laahi Saylici oo ay wehelinayeen xildhibaanada golayaasha Baarlamaanka kaga jira G/Awdal qaarkood iyo M/xigeenkii hore ee Somaliland C/raxmaan Aw Cali Faarax ayaa booqasho hal maalin ah ku soo gaadhay Borama, markii uu soo galay gaadhay magaalada ayuu M/xigeenku booqday Ugaaska C/rashiid Ugaas Rooble oo magaalada Boorama mudo ku sugnaa.
M/xigeenka iyo Ugaaska kulankoodii ayaa waxay labadooduba isku bogaadiyeen kulankooda iyo isku imaatinka dhexmaray oo ahaa mid mudo laga shaqaynayay, Mudane Saylici oo kulankaasi ka hadlay ayaa wuxuu yidhi ” Waxaan ku faraxsanahay kulanka aan kula kulmay adiga oo ah Ugaaskii Gadabuursi, farxad ayay ii tahay in la igu soo dhaweeyo Guriga Ugaaska oo aan la kulmo madaxda dhaqanka iyo waxgaradka Beesha
Ugaas C/rashiid Ugaas Rooble ayaa dhankiisa isna wuxu yidhi ” waxaan kugu soo dhaweynayaa imaatinka aad ii timid, waxaanan ku farxsanahay in aynu kulano waana mid guul ah, waxaanan ku leeyahay ku soo dhawow dalkaagii iyo dadkaagii.
Intaasi ka bacdi waxa uu kulano la qaatay M/xigeenku shirkada biyaha ee Boorama ee SHABA, wuxuuna kulan la qaatay masuuliyiin iyo maareeyaha shirkadaasi adeegyada biyaha ee Boorama, Maxamed Nuur Faahiye oo ah madaxa Boardka shirkada ayaa u sheegay in magaalada ay biyaha gaadhsiiyeen 8kun oo guri, dedaalna ay ugu jiraan inay sii balaadhiyaan biyaha, wuxuu intaas ku daray inay bateen isticmaalka biyaha ee magaaladu, M/xigeenka ayaa isna dhankiisa ku amaanay waxqabadka shirkadaasi, wuxuuna xusay in ay heshiiskii tobanka sano ee biyaha Boorama loo dhiibay shirkada SHABA ay heshiiskii ka soo baxday, isla markaana uu heshiiskii dhaw yahay mudaddisii, mana xusin in shirkada loo kordhin doono heshiiskaasi iyo lagu wareejin doono shirkad kale.
Ugu dambayn wuxuu M/xigeenku ka qaybgalay kulan uu ku casuumay madaxda dhaqanka ee G/Awdal oo ku marti qaaday hutelka RAYS, halkaasi oo Saylici ka sheegay in imaatinkiisu ahaa sidii uu bogaadin ahaa midnimada dhaqanka ee mudooyinkan dambe aad samyseen, isla markaana loo baahan yahay in aan iskiin garabtaagno, taas oo qabyaaladu ay Soomaalida dhaqan u tahay wakhtiga laga baxaana ay goor dambe tahay, siyaasiga wanaagsan waxaa lagu gartaa in waxa dadkiisu qabsado uu bogaadiyo, waxa kale oo aan idin kula talinayaa inaad soo dhaaftaan Boorama oo aad timaadaan Hargaysa oo aad wixii aad doonaysaan aad halkaasi ka doonataan, waxaad tihiin dadkii aasaasay Somaliland, sheegta wixiina oo shaaca ka cadeeya, inaad calaacashaan, cabataan maaha ee xaqiina sheegta.

Madaxweyne kuxigeenka Somaliland, Cabdiraxmaan Cabdullahi Saylici ayaa dhaleeceeyay dil xalay ganacsade loogu geystay deegaanka Xariirad ee degmada Saylac ee gobolka Awdal.
Saylici ayaa tilmaamay in hal aragti laga qaato qof walba oo dembi geysta si loo joojiyo dhibaatooyinka ay dembiilayaashu u geysanayaan dadka rayid ah, isagoo sheegay in gacanta lagu soo dhigi doono ninkii ka dambeeyay dilkaasi.
Madaxweyne ku- xigeenka ayaa sidoo kale odayaasha gobolka Awdal kala hadlay sida ugu wanaagsan ee loo xoojin karo amniga gobolka, maadaama uu amni darro ay horseedi karto in gobolku uusan horumar ku tallaabsan.
Saylici ayaa sheegay in maamulka madaxweyne Siilaanyo ay go’an yahay in uu sugo amniga guud deegannada uu ka taliyo, isagoo sheegay in cidkasta oo ku xad-gudubta sharciga, ama gasha fal-dembiyeed caddaaladda lala tiigsandoono.
C/raxmaan Aw Cali Faarax oo isaguna madashaasi ka hadlay ayaa wuxuu yidhi ” In badan ayaa la isweydiinayay muxuu M/xigeenku uga maqan yahay Ugaaska, wuxuu yimid maalintii qadarku qornaa oo ah maanta, Midnimadu waa mid u dan ah M/xigeenka, waa mid u dan ah xildhibaanada waa mid dan u ah bulshada iyo xukuumada oo waa in la helaa cid dadkan loogu soo hagaago kaas oo la isku raacay in dhanka dhaqanka looga dambeeyo Ugaask C/rashiid Ugaas Rooble, xaga siyaasadana waa kolba cida Joogta marba Awr ayaa dhaamiya, Midnamadu dhanka beelaha deriskeena waa u dan dhanka Horumarka oo u dan, uma midoobaysaan in aan dad ku duulo iyo aan nabadgelyada xumayno ee waa mid xaqeena iyo rabitaankeena iyo wanaaga Somaliland aan u midoobayno.
Waxaa iyaguna goobtaasi hadalo mahadnaqan iyo midno ay heleen ka Oday dhaqameedo ahaan ka tilmaaamay qaar ka mid ah Salaadiinta kala ah Suldaan Ibraahim Jamac Samatar, Suldaan Abuubakar Cilmi, Caaqil Cabdi Axmed Cige iyo Suldaan Ibraahim Dacar, waxaanay xuseen inay xal ka gaadheen khilaaf mar soo maray oo dhanka dhaqank ah, ayna uga dambaynayaan cida dhaqanka ugu saraysa Ugaas C/rashiid Ugaas Rooble Ugaas Doodi oo dhaqan ahaan hore u ahaa Sulaaladii amase hogaankii dhaqan ee soo jireenka ahaa ee ay lahaan jireen Beelaha Gadabuursi, taariikhda Ugaasyada Gadabuursi ayaa iyadu bilaabantay sanadkii 1607dii markay taariikhdu ahayd wakhtigaasi oo la caleemo saaray Ugaaskii ugu horeeyay, waxaana lagu tiriyaa hogaamada dhaqanka ee ugu horeeyay qabaailka Soomaaliada. Ugaaska hada ee Ugaas C/rashiid ayaa Aabihii waxaa lagu dilay sanadkii 1977kii magaalada Jigjiga wakhtigaasi oo ay dileen ciidamadii dhargiga ee Mangiste, Sidoo kale Ugaas Doodi ayaa isaguna ahaa Ugaas xadhig kala kulmay Gumaystihii Ingiriiska sanadadii Afartanadii, waxaana la wada xidhay Isaga(Ugaas Doodi) iyo Garaad Maxamuud Cali Shire iyo Faarax Oomaar, wuxuuna Ingiriisku xidhay Jasiirada Comoros oo uu gumaysan jiray, sababta xadhigoodana waxaa lagu tilmaama inay xoriyad doon ahaayeen.

Awdalpress

Hashim Goth

Daawo: M/xigeenku kulanadii uu khaaska ula qaatay Ugaaska Beelaha Gadabuursi iyo Madaxda shirakada SHAABA ee Adeega biyaha Boorama gacanta ku haysa

staff-reporter — Tue, 18 Jun 2013 19:04:18 +0000

Daawo:-M/xigeenku kulanadii uu khaaska ula qaatay Ugaaska Beelaha Gadabuursi iyo Madaxda shirakada SHAABA ee Adeega biyaha Boorama gacanta ku haysa

Heestii midnimada ummadda ereyadii Hassan Sh. Muumin ku soo dhawaada.

staff-reporter — Tue, 18 Jun 2013 17:03:18 +0000

Midnimada ummaddu waa mid tiir dhexaad u ah horumarka ummadda, jiritaanka ummadda, xorriyadda ummadda, karaamada ummadda iyo sharafta qofnimo ee khaaska ah. In aad shakhsiyaad kale u sandullaysnaataana waa daciifnimo ummadda ku keenta tafaraaruq iyo liitinnimo.
Haddaba inkasta oo ay ummaddii heshay midnimo, waxa aan maanta u saaraynaa heestan wakhti walba la socota ee Allaha u naxariistee Abwaankii Hassan Sh. Muumin uu wakhti hore tiriyey.Bal nala dhageysta.

Awdalress.com

Daawo: M/xigeenka Saylici oo booqday Ugaas C/rashiid Ugaas Rooble iyo kulanadii uu la qaatay dhamaan madaxda dhaqan oo uu wehelinayay C/raxmaan Aw Cali

staff-reporter — Tue, 18 Jun 2013 14:22:25 +0000

M/xigeenka Somaliland oo booqday Ugaas C/rashiid Ugaas Rooble iyo kulanadii uu la qaatay dhamaan madaxda dhaqan oo uu wehelinayay C/raxmaan Aw Cali.

Madaxweyne ku xigeenka Somaliland Abdiraxman Ismail Saylici iyo Madaxweyne ku xigeenkii hore ee Somaliland Abdiraxman Aw Cali ( geesi tol helay ) ayaa kulan heer sare ah la yeeshay Ugaaska Gadabuursi oo immiga jooga Borama.

staff-reporter — Tue, 18 Jun 2013 14:17:00 +0000

Awdalpress – Borama – Madaxweyne ku xigeenka Somaliland md Cabdiraxmaan Ismaaciil (Saylici) iyo Madaxweyne ku xigeenkii hore Abdirahman Aw Cali ayaa maanta booqasho ku tagay magaalo madaxda gobolka awdal ee Boorama, halkaas oo si weyn loogu soo dhaweeyey. Soo dhaweyntii kadibna waxa ay si toos ah ugu booqdeen Ugaaska Gadabuursi Ugaas Abdirashid Dooddi

Safarka labadan mas’uul oo aan horay loo shaacin ayaa ujeeddada ka dambaysaa ay tahay adkaynta midnimada beelaha Gadabuursi, oo sannaddo horteed uu tafaraaruq badani ku jiray, laakiin dadaal badan kadib la soo af jaray, immaga la go’aansaday in si midaysan loo wajaho talada iyo baahida bulshada.

Ugaaska Gadabuursi oo midnimada Gadabuursiga calaamad u ah ayaa waxa maalin walba qaabilaa waxgarad iyo mas’uuliyiin dalka iyo dabaddaba uga yimaadda. Maanta oo ugu dambayseyna waxa qasriga uu Borama ka deggen yahay uu ku qaabilay Madaxweyne ku xigeenka Somaliland Cabdiraxman Zaylici iyo wafdi uu hoggaaminayey.

Awdalpress.com

Saan saan colaadeen oo laga dareemayo dhulka kala rogan ee Itoobiya iyo Somaliland.

staff-reporter — Tue, 18 Jun 2013 14:02:19 +0000

Awdalpress – Xariirad – Warar xog ogaal ah oo ka imanaya dooxooyinka kala rogan ee gobollada Awdal, Salal iyo dooxada Harawa ee Itoobiya, ayaa laga dareemayaa saansaan colaadeed iyo dhallin yar hublay ah oo jiidahaa soo buuxiyey, waxana la sheegayaa in ay ka xanaaqsan yihiin wax ay ku sheegeen duullimaad lagu soo qaaday shacabka dhulkaa dega iyo xadhigga xaq darrada ah ee odayada lagu xidh xidhay.

Shalay galab ayey ahayd markii si kamma’ ah lagu dilay Marxuum Tareese Liqe oo ka mid ahaa ganacsatada degaankaasi kana soo jeeda beesha Ciise. Waxana la sheegayaa in rag afka soo duubtay oo aan haybtooda la garanayni ay marxuumka ku dileen gurigiisa.

Dhiilladan ka dhacday degaanka Xariirad ayaan weli la garanayn meesha laga soo abaabulay, waxase dad shabakaddan la soo xidhiidhay ay farta ku fiiqayaan siyaasiyiin kala jooga Hargeysa iyo Djabouti. Sababtana waxa ay la xidhiidhinayaan in ula jeeddadoodu tahay dhib magaalooyinkaa ka jira oo la rabo in loo wareejiyo jiidda Xariirad, oo ay muddaba ka jirtay arrimo la dhex dhigay shacabkaasi.

Si kastaba arrini ha ahaatee, waxa muddooyinkan ku soo badanaya dalka Somaliland is dilka iyo haybta qabiil oo immiga uun soo cusboonaatay. Dhibaatadanina kuma koobna degaan iyo gobol kaliya. Waxanan ka warqabnaa in shalay ay Maxkamadda Burco rag ku xukuntay dil. Horena waxa loo hayey kiisas dilal ah oo ay qaarkood sannaddo jiitamayaan oo ka dhacay gobollo kala geddisan oo Somaliland ka mid ah, dadkii lagu soo eedeeyey dilalkaasi oo ay xataa mas’uuliyiini ku jirtayna aanay weli dawladda Somaliland waxba ka qaban.

Si kasta ha ahaatee, waxa aan shaki ku jirin in arrinta ammaan darro ee ciidammada xad dhaafka ah loo adeegsanayaa ay noqon keeni doonaan isku dhac ka dhex aloosma shacabka gobolladaasi iyo dawladda Somaliland.

Awdalpress.com

Dilkii Marxuum Daahir Yuusuf oo loo xidhay odayaal degaanka ah iyo su’aal la iska weydiinayo mu’aamaraadka lagu dilay marxuumkaasi.

staff-reporter — Tue, 18 Jun 2013 09:39:34 +0000

Awdalpress – Xaariirad – Sida dad magacyadooda qariyey ay u sheegayaan shabakadda awdalpress.com, ayaa waxa la sheegayaa in dilka ka dhacay Xariirad aanu la xidhiidhin dakano iyo aarsi, balse ay tahay mu’aamarad la isaga hor keenayo shacabka walaalaha ah ee wada dega galbeeda Somaliland ujeeddada kalena tahay in dhibta Hargeysa ka taagan laga jeesto. Waxana farta lagu fiiqayaa siyaasiyiin dhib ka wada Hargeysa iyo Djabouti, oo iyagu doonaya in ay dab ka dhex shidaan beelaha Gadabuursi iyo kuwa Ciise.

Wararka ka imanaya magaalada xariirad ayaa waxa kale oo ay sheegay in xaaladda magaaladu ay immiga

deggan tahay , kaddib markii xalay lagu dilay nin ganacsade ah.

Marxuumka xalay la dilay oo magaciisa la odhan jiray Daahir Yuusuf ayaa maanta lagu aasay magaalada xariirad.

Waxaa kale oo maanta ciidanka nabadgalyadu xidheen shan oday oo ay noo suurta gashay in aan helno afar ka mid ah magacyadooda ayana kala yihiin.

Maygaag daahir Bucul

Bashiir daahir Hanfi

Caaqil Cali Cumar Aare

Cadoosh Bille Cabdilaahi

Xadhigga raggan ayaa dadka magaalada Xariirad ay ku sheegeen xad gudub loo geystay muwaaddiniin aan wax dambi ah gelin.

Dhinaca kale waxaa magaalada la soo dhoobay ciidan iskugu jira ciidamada booliska iyo kuwa milatariga oo lagu soo xoojiyey ciidan kale oo maanta magaalada soo gaadhay.

Shaqaaqadan ayaa loo maleeyaa in ay noqon doonto mid degaankaa ka abuurta dagaallo faraha lagaga gubto, oo ay isaga hor yimaaddaan shacabka degaanka iyo ciidanka uu maamulka Somaliland soo dhoobay jiidahaasi.

Wararkayaga danbe ayaad ku dhagaysan doontaan waraysiyo aan ka soo qaadnay goob joogaal ku sugan magaalada xariirad.

Awdalpress.com

TACSI KU SOCOTA EHELADII MARXUUMAD NASIIM XAAJI IBRAAHIM NUUR

staff-reporter — Mon, 17 Jun 2013 20:33:57 +0000

INNAA LILLAAHI WA INNAA ILAYHI RAAJICUUN….Dhammaan reer Sh. Omer Goth meel kasta oo ay joogaan waxa ay tacsi tiiraanyo leh u dirayaan eheladii ay ka baxday marxuumad Nasiim Xaaji Ibrahim Nuur. Waxanan marxuumadda Ilaahay uga baryeynaa in uu Jannadii ka waraabiyo, eheladii, qaraabadii iyo asxaabteediina uu samir iyo iimaan ka siiyo.

Aammiin